Glossary

LUDOWICO ORIENTALIVM REGNORVM REGI SIT SALVS AETERNA.

Ludouuig ther snello,			thes uuisduames fullo, 
   er ostarrichi rihtit al,		so frankono kuning scaL; 
Vbar frankono lant			so gengit ellu sin giuualt,
   thaz rihtit, so ih thir zellu,	thiu sin giuualt ellV. 
5
Themo si iamer heili			ioh salida gimeini, 
   druhtin hohe mo thaz guat		ioh freuue mo emmizen thaz muaT, 
Hohe mo gimuato				io allo ziti guato! 
   er allo stunta freuue sih!		thes thigge io manno giliH. 
Oba ih thaz iruuellu,			theih sinaz lob zellu, 
   zi thiu due stunta mino,		theih scribe dati sinO: 
10
Vbar mino mahti				so ist al thaz gidrahti:
   hohe sint, so ih thir zellu,		thiu sinu thing ellV. 
Vuanta er ist edil Franko,		uuisero githanko, 
   uuisera redinu:			thaz duit er al mit ebinV.
15
In sines selbes brusti			ist herza filu festi, 
   managfalto guati:			bi thiu ist sinen er gimuatI.
Cleinero githanko 			so ist ther selbo franko, 
   so ist ther selbo edilinc: 		ther heizit auur LudouuiC. 
Ofto in noti er uuas, in uuar:		thaz biuuankota er sar 
20 
   mit gotes scirmu scioro		ioh harto filu ziorO. 
Oba iz uuard iouuanne			in not zi fehtanne, 
   so uuas er io thero redino		mit gotes kreftin oborO. 
Riat got imo ofto in notin, 		in suaren arabeitin; 
   gigiang er in zala uuergin thar,	druhtin half imo saR 
25 
In notlichen uuerkon:			thes scal er gote thankon.
   thes thanke ouh sin gidigini		ioh unsu smahu nidirI. 
Er uns ginadon sinen riat,		thaz sulichan kuning uns gihialt: 
   then spar er nu zi libe		uns allen io zi liabE. 
Nu niazen uuir thio guati		ioh fridosamo ziti
30
   sines selbes uuerkon:		thes sculun uuir gote thankoN.
Thes mannilih nu gerno			ginada sina fergo;
   fon got er muazi haben munt		ioh uuesan lango gisunT. 
Allo ziti guato				so leb er io gimuato, 
   ioh bimide io zala,			thero fianto farA. 
35
Lango, liobo druhtin min,		laz imo thie daga sin, 
   suaz imo sin lib al,			so man guetemo scaL!
In imo irhugg ih thrato			Dauides selbes dato: 
   er selbo thulta ouh noti		iu manago arabeitI.
Vuant er uuolta man sin			 (thaz uuard sid filu scin),
40
   thegan sin in uuaru			in manegeru zal	V. 
Manag leid er thulta,			unz thaz tho got gihangta; 
   ubaruuant er sid thaz fram,		so gotes thegane gizaM. 
Riat imo io gimuato			selbo druhtin guato,
   thaz sagen ih thir in alauuar,	selbo maht iz lesan thaR. 
45 
Eigun uuir thia guati,			gilicha theganheiti 
   in thesses selben muate		zi managemo guatE. 
Giuuisso, thaz ni hiluh thih,		thulta therer samalih 
   arabeito ginuag,			mit thulti sama iz ouh firdruaG. 
Ni liaz er imo thuruh thaz		in themo muate then haz:
50 
   er mit thulti, so er bigan,		al thie fianta uberuuaN. 
Oba es iaman bigan,			thaz er uuidar imo uuan:
   scirmta imo iogilicho		druhtin lioblichO.
Riat imo io in notin,			in suuaren arabeitin, 
   gilihta imo ellu sinu iar,		thiu nan thohtun filu suaR,
55 
Vnz er nan gileitta,			sin richi mo gibreitta.
     bi thiu mag er sin in ahtu		thera Dauides slahtU. 
Mit so sameliche			so quam er ouh zi riche; 
   uuas gotes drut er filu fram:	so uuard ouh therer, so gizaM. 
Rihta gener scono			thie gotes liuti in frono: 
60
   so duit ouh therer ubar iar,		so iz gote zimit, thaz ist uuaR, 
Emmizen zi guate,			io heilemo muate
   fon iare zi iare,			thaz sagen ih thir zi uuarE.
Gihialt Dauid thuruh not		thaz imo druhtin gibot, 
   ioh gifasta sinu thing,		ouh selb thaz rihi al umbirinG: 
65
In thesemo ist ouh scinhaft,		so fram so inan lazit thiu craft, 
   thaz er ist io in noti		gote thionontI;
Selbaz richi sinaz al			rihtit scono, soso er scal, 
   ist ellenes guates			ioh uuola quekes muate	S. 
Ia farent uuankonti			in anderen bi noti 
70
   thisu kuningrichi			ioh iro guallichI: 
Toh habet therer thuruh not,		so druhtin selbe gibot, 
   thaz fiant uns ni gaginit,		thiz fasto binagiliT, 
Simbolon bisperrit,			uns uuidaruuert ni merrit:
   sichor mugun sin uuir thes;		lange niaz er libeS! 
75
Allo ziti, thio the sih,		Krist loko mo thaz muat sin, 
   bimide ouh allo pina!		got freuue sela sinA!
Lang sin daga sine			zi themo euuinigen libe! 
   bimide ouh zalono fal,		thaz uuir sin sichor ubaraL!
Uuanta thaz ist funtan,			unz uuir haben nan gisuntan, 
80
   thaz leben uuir, so ih meinu,	mit freuui ioh mit heilU
Simbolon gimuato			ioh eigun ziti guato. 
   niaz er ouh mammuntes,		ni breste in euuon imo theS!
Allen sinen kindon			si richiduam mit minnon, 
   si zi gote ouh minna			thera selbun kuninginn	A!
85
Euuiniga drutscaf			niazen se iamer, soso ih quad, 
   in himile zi uuare			mit Ludouuige tharE!
Themo dihton ih thiz buah;		oba er habet iro ruah, 
   odo er thaz giuueizit,		thaz er sa lesan heiziT: 
Er hiar in thesen redion		mag horen euangelion, 
90
   uuaz Krist in then gibiete		frankono thietE.
Regula thero buachi			uns zeigot himilrichi:
   thaz niaze Ludouuig io thar		thiu euuinigun gotes iaR! 
Niazan muazi thaz sin muat		io thaz euuiniga guat!
   thar ouh iamer, druhtin min,	 	laiz mih mit imo siN! 
95
Allo ziti guato				leb er thar gimuato, 
   inliuhte imo io thar, uuunna,	thiu euuiniga sunnA!

Glossary