ERAT QUIDAM REGULUS. Tho Krist in Galilea quam, uuard thaz tho mari, sos iz zam, ioh uuard gikundit sin giuualt ubar allaz thaz lant. Ein kuning gieiscot iz in uuar ioh fuar ingegin imo sar; uuaz mag ih zellen thir es mer? sin sun uuas filu siecher. 5 Bat, er sih sar irhuabi, mit imo heim fuari, thaz er thar gimeinti, then sun imo giheilti. Quad, er io bi noti lagi dauualonti ioh uuari in theru suhti mit grozeru unmahti. Gab er mo antuuurti mit mihileru milti; 10 mit uuorton uuolt er suazen thia gilouba in imo buazen. 'Ir zeichan ni giscouuot, thanne iu uuirdit so not, uuuntar seltsanu, ni giloubet ir zi uuaru.' Uuanta ob er giloubti ubaral, so iz bi rehte uuesan scal, in herza imo quimi, so iz fora gote zami: 15 Giloubt er selbo thanne, so zimit gotes manne, thaz iagiuuar ist druhtin mit sines selbes mahtin; Thaz then ni tharf man beten, after stetin leiten, ther so kreftiger ist, bihabet thaz in uuorolti ist. 'Druhtin', quad er, 'zilo thin, oba thu ginadon uuili min! 20 thin guatiz er biuuerbe, er mir ther sun irsterbe.' Sprah druhtin zi imo sinaz uuort, thaz er fuari heimort, thaz er fuari tharasun; quad, funti ganzan sinan sun. Giloubt er themo uuorte ioh kerta sih zi lante, sar bi themo thinge zi themo heiminge. 25 Unz er fuar ahtonti thes selben uuortes mahti, gagantun imo blide thie holdun scalka sine; Zaltun imo ouh innan thes thrato filu liebes, thaz rehto in alauuari sin sun gineran uuari. Thia zit er eiscota tho (uuas er es harto filu fro), 30 thia stunta ouh mit giuuurti, uuanne imo baz uuurti. 'Herero, zellen uuir thir thaz, tho sibunta zit thes dages uuas, gesteren, so sie sahun, tho uuard er ganzer gahun. Ni zuivolo muat thinaz, sus findist thu iz gidanaz; findist zi alauuare then liobon drost sus thare.' 35 Yrkanta tho ther fater sar, theiz thiu zit uuas in uuar, thaz imo iz druhtin so giliaz thia selbun ganzida gihiaz; Giloubta sar tho selbo ther kuning irdisgo tho mit sinemo githigine themo himilisgen kuninge.
MORALITER. Thiz ist uns ungizami, so ih iz nu firnami, noh ni quimit uns thiz guat in unser armilichaz muat; Thoh habet er uns gizeigot, ioh ouh mit bilide gibot, uuio uuir thoh duan scoltin, oba uuir iz uuoltin. 5 Iu quam ein sculdheizo bi notthurfti heizo, bat, er sin uuort gimeinti, er sinan skalk heilti; Er quad, er selbo quami, then ummahtin binami, thoh gener thara ni geroti sin selbes geginuuerti. Ther kuning bat, er quami: ni uuas Kriste thaz gizami; 10 ther sculdheizo es ni gerota: er thara thoh faran uuolta! Hiar streuuit thiu sin guati in uns thio ubarmuati, thia unsera dumpheit, so uuar so iz io zi thiu gigeit. Uuir lazemes uns lichan man then filu rlchan, firmonames zi noti anderero armuati; 15 In in ist uns gimuati geld ioh diuro uuati, ni nemen in thia ahta manno scalkslahta. Ni bidrahtot unser sumilih, thaz uuir birun al gilih, einera giburti, thoh iz sid sulih uuurti; In sumen duen zi nidiri thera giscefti ebini, 20 in sumen thuruh thia era ist uns ther scaz mera. Bi thiu habet unz iz selbo got hiar forna nu gibilidot, natura in uns ni fliehen ioh zi ebine giziehen: Er uuolta sines thankes uuison thar thes scalkes; zemo sune, sih nu zalta, giladoter ni uuolta. 25 Ob unsih auur ladot heim man armer thehein, thuruh ubarmuati in uuar so suillit uns thaz muat sar; Thes uuizun thank thanne richemo manne, githankon uuorton sinen ioh diofo imo ouh ginigen.