In principio erat verbam. Er allen uuoroltkreftin ioh engilo gisceftin, so rumo ouh so in ahton man ni mag gidrahton; Er se ioh himil uurti ioh erda ouh so harti. ouh uuiht in thiu gifuarit, thaz siu ellu thriu ruarit: 5 So uuas io uuort uuonanti er allen zitin uuorolti; thaz uuir nu sehen offan, thaz uuas thanne ungiscafan. Er allem anagifti theru druhtines giscefti, So uuas iz mit gilusti in theru druhtines brusti. Iz uuas mit druhtine sar (ni brist imos io thar) 10 ioh ist ouh druhtin ubaral, uuanta ir iz fon herzen gibar, Then anagin ni fuarit ouh enti ni biruarit ioh quam fon himile obana (uuaz mag ih sagen thanana?). Er mano rihti thia naht ioh uurti ouh sunna so glat, odo ouh himil, so er gibot, mit starron gimalot: 15 So uuas er io mit imo sar, mit imo uuoraht er iz thar; so uuas ses io gidatun, sie iz allaz saman rietun. Er ther himil umbi sus emmizigen uuurbi, odo uuolkan ouh in noti then liutin regonoti: So uuas er io mit imo sar, mit imo uuoraht er iz thar; 20 so uuas ses io gidatun, sie iz allaz saman rietun. Tho er data, thaz sih zarpta ther himil sus io uuarpta, thaz fundament zi houfe, thar thiu erda ligit ufe: So uuas er io mit imo sar, mit imo uuoraht er iz thar; so uuas ses io gidatun, sie iz allaz saman rietun. 25 Ouh himilrichi hohaz ioh paradys so sconaz, engilon ioh manne thiu zuei zi buenne: so uuas er io mit imo sar, mit imo uuoraht er iz thar; so uuas ses gidatun, sie iz allaz saman rietun. So er thara iz tho gifiarta, er thesa uuorolt ziarta, 30 thar mennisgon gistatti, er thionost sinaz dati: So uuas er io mit imo sar, mit imo uuoraht er iz thar; so uuas ses io gidatun, sie iz allaz saman rietun. Sin uuort iz al gimeinta, sus managfalto deilta, al io in thesa uuisun thuruh sinan einegan sun. 35 So uuaz so himil fuarit, ioh erdun ouh biruarit, ioh in seuue ubaral, got detaz thuruh inan al. Thes nist uuiht in uuorolti, thaz got ana inan uuorahti, thaz druhtin io gidati ana sin girati. Iz uuard allaz io sar soso er iz gibot thar, 40 ioh man iz allaz sar gisah sos er iz erist gisprah. Thaz thar nu gidan ist, thaz uuas io in gote, sos iz ist, uuas giahtot io zi guate in themo euuinigen muate. Iz uuas in imo io quegkaz ioh filu libhaftaz, uuialih ouh ioh uuanne er iz uuolti irougen manne. 45 Thaz lib uuas lioht gerno suntigero manno, zi thiu thaz sie iz intfiangin int irri ni giangin. In finsteremo iz scinit, thie suntigon rinit; sint thie man al firdan: ni magun iz bifahan. Sie bifiang iz alla fart, thoh sies ni uuurtin anauuart, 50 so iz blintan man birinit, then sunna biscinit.