Iesus fatigatus ex itinere. Sid tho thesen thingon fuar Krist zi then heimingon, in selbaz geuui sinaz, thio buah nennent uns thaz. Thera ferti er uuard irmuait, so ofto farantemo duit; ni lazent thie arabeit es frist themo uuarlicho man ist 5 Fuar er thuruh Samariam, zi einera burg er thar tho quam, in themo agileize zi einemo gisaze. Tho gisaz er muader, so uuir gizaltun hiar nu er, bi einemo brunnen, thaz uuir ouh puzzi nennen. Ther euangelio thar quit, theiz mohti uuesan sexta zit, 10 theist dages heizesta ioh arabeito meista. Thie iungeron iro zilotun, in koufe in muas tho holetun, thaz sie thes giflizzin, mit selben Kriste inbizzin. Unz druhtin thar saz eino, so quam ein uuib thara tho, thaz sie thes giziloti, thes uuazares giholoti. 15 'uuib', quad er, innan thes 'gib mir thes drinkannes; uuird mir zi gifuare, thaz ih mih nu gikuale.' 'Vuio mag thaz', quad si, 'uuordan (thu bist iudiisger man, inti ih bin thesses thietes), thaz thu mir so gibietes?' Thaz offonot Iohannes thar, bi hiu si so quad in uuar, 20 bi uuiu si thaz so zelita, thaz drinkan so firsageta: Uuanta thio zua liuti ni eigun muas gimuati uuergin zi iro mazze in einemo fazze. 'Oba thu', quad er, 'datist, thia gotes gift irknatis, ioh uuer dih bitit thanne ouh hiar zi drinkanne: 25 Thu batis inan odo sar, er gabi thir in alauuar zi liebe ioh zi uuunnon springentan brunnon.' 'Ni habes', quad si, 'fro min, fazzes uuiht zi thiu hera in, thu herazua gilepphes, uuiht thesses sar giscepphes. Uuaz mag ih zellen thir ouh mer? ther puzz ist filu diofer. 30 uuar nimist thu thanne ubar thaz uuazar fliazzantaz? Furira uuan ih thu ni bist, thanne unser fater Jacob ist: er drank es, so ih thir zellu, ioh sinu kind ellu. Er uuola iz al bithahta, thaz er mit thiu nan uuihta, ioh gab uns ouh zi nuzzi thesan selbon puzzi.' 35 Quad unser druhtin zi iro tho: 'firnim nu uuib theih redino, firnim thiu uuort ellu, thiu ih thir hiar nu zellu. Ther thuruh thurst githenkit, thaz thesses brunnen drinkit, nist lang zi themo thinge, nub auur nan thurst githuinge; Ther auur untar mannen niuzit minan brunnon, 40 then ih imo thanne gibu zi drinkanne: Thurst then mer ni thuingit, uuant er in imo sprlngit; ist imo kuali drato in euuon mammonto.' 'Thu mohtis', quad siu, 'einan ruam, ioh ein gifuari mir giduan, mit themo brunnen thu nu quist mih uuenegun gidranktist, 45 Theih zes puzzes diufi sus emmizen ni liafi, theih thuruh thino guati bimidi thio arabeiti.' 'Holo', quad er, 'sar zi erist thinan gomman thar er ist; so zilot iuuer hera sar: ih zellu iu bethen thaz uuar.' 'Ih ni haben', quad siu, 'in uuar uuiht gommannes sar.' 50 gab antuurti gimuati sines selbes guati: 'Thu sprachi in uuar nu so zam, thu ni habes gomman; giuuisso zellu ih thir nu: finfi habotost thu iu. Then thu afur nu uabis ioh thir zi thiu liubis, uuant er giuuisso thin nist, bi thiu sprachi thu so iz uuar ist' 55 'Min muat', quad si, 'duat mih uuis, thaz thu forasago sis: thinu uuort nu zelitun, thaz man thir er ni sagetun. Unsere altfordoron thie bototun hiar in bergon: giuuisso uuan ih nu thes, thaz thu hiar bita ouh suaches. Quedet ir ouh Iudeon nu, thaz si zi Hierosolimu 60 stat filu richu, zi thiu gilimpflichu.' 'Vuib', quad er, 'ih sagen thir, thaz giloubi thu mir, quement noh thio ziti mennisgon bi noti, Thaz ir noh hiar noh ouh thar ni betot then fater, thaz ist uuar. giuuisso ir betot alla frist thaz iu unkundaz ist. 65 Uuir selbe beton auur thar thaz uuir uuizun alauuar; uuanta heil, so ih redion, thaz quimit fon then Iudion. Thoh quimit noh thera ziti frist ioh ouh nu geginuuertig ist, thaz betont uuare betoman then fater geistliche fram: Uuant er suachit filu fram thrato rehte betoman, 70 thaz sie nan geistlicho boten io gilicho. Ther geist ther ist druhtin mit filu hohen mahtin; mit uuaru uuilit ther gotes geist, thaz man inan bote meist' Si nam gouma harto thero druhtines uuorto ioh kerta tho mit uuorte zi diafemo antuurte: 75 'Ein man ist uns giheizan ioh scal ouh Krist heizan: uns duit sin kunft noh uuanne thaz al zi uuizanne, Irrachit uns sin guati allo theso dati ouh scono ioh giringo managero thingo.' Gab iru mit milti tho druhtin antuurti: 80 thaz bin ih, giloubi mir, ih hiar sprlchu mit thlr.' Tho quamun thie iungoron innan thes, sie uuuntar uuas thes thinges: sih uuuntorotun harto iro zueio uuorto, Thaz sih liaz thiu sin diuri mit otmuati so nidiri, thaz thaz euuiniga lib lerta thar ein armaz uuib. 85 So sliumo siu gihorta thaz, firuuarf si sario thaz faz, ilta in thia burg in zen liutin, sageta thiz al in. 'Quemet', quad si, 'sehet then man, ther mir thaz allaz brahta fram mit uuorton mir al zelita, so uuaz sih mit uuerkon sitota. Scal iz Krist sin fro min? ih sprichu bi then uuanin. 90 thaz selba sprichu ih bi thiu iz ist gilih filu thiu. Bi then gidougnen seginin so thunkit mih, theiz megi sin: er al iz untaruuesta, thes mih noh io gilusta.' Sie iltun tho bi manne fon theru burg alle; iltun al bi gahin, thaz sie nan gisahin. 95 Innan thes batun thar thie iungoron then meistar, thaz er thar gisazi zi dagamuase inti azi. Er quad, er muas habeti, sos er in thar tho sageti, mit suazlichen gilustin, thoh sies uuiht ni uuestin. In quam tho in githahti, thaz man imo iz brahti, 100 unz se odo uuarun zi theru burg koufen iro notthurft. 'Min muas ist', quad er, 'follo mines fater uuillo, theih emmizen irfulle so uuaz so er selbe uuolle. Ir quedet in alauuari, thaz manodo sin noh fiari, thaz thanne si, so man quit, reht arno gizit. 105 Nu sehet, mit then ougon biginnet umbiscouuon: nist akar hiar in riche, nub er zi thiu nu bleiche, Ni sie zi thiu sih machon, sos ih iu hiar nu rachon, thaz fruma thie gibura fuaren in thia scura. lh santa iuih arnon: ir ni satut tho thaz korn, 110 giangut ir bi noti in anderero arabeiti.' Giloubta thero liuto filu thar tho drato, thie thara zi imo quamun, thia lera firnamun. Gimuatfagota er tho in, uuas zuene daga thar mit in: milti sino iz datun, so sie nan thar tho batun. 115 Giloubta iro ouh tho in uuara filu harto mera, uuanta sin selbes lera thiu uuas in harto mera. Sprachun sie tho blide zi themo selben uuibe, thiu erist thara in thia burg deta sina kunft kund: 'Ni gilouben uuir in uuara thuruh thia thina lera: 120 nu uns thiu fruma irreimta, thaz er uns selbe zeinta; Nu uuizun in alauuari, thaz er ist heilari, thaz er quam hera zi uuorolti, er mennisgon gineriti.'