Oratio dominica. Fater unser guato, bist druhtin thu gimuato in himilon io hoher uuih si namo thiner. Biqueme uns thinaz richi, thaz hoha himilrichi, 30 thara uuir zua io gingen ioh emmizigen thingen. Si uuillo thin hiar nidare, sos er ist uf in himile. in erdu hilf uns hiare, so thu engilon duist nu thare. Thia dagalichun zuhti gib hiut uns mit ginuhti ioh follon ouh, theist mera thines selbes lera. 35 Sculd bilaz uns allen, so uuir ouh duan uuollen, sunta thia uuir thenken ioh emmizigen uuirken. Ni firlaze unsih thin uuara in thes uuidaruuerten fara, thaz uuir ni missigangen, thara ana ni gifallen. Losi unsih io thanana, thaz uuir sin thine thegana, 40 ioh mit ginadon thinen then uueuuon io bimiden. Amen.