NUPTIAE FACTAE SUNT. After thiu in uuar min so mohtun thri daga sin; so thes thritten dages sar so uuard thi, thaz ih sagen thar: Uaptun thar thie liuti eino brutloufti themo uuirte ioh theru bruti in saligeru ziti. 5 Ni uuard io in uuoroltzitin, thiu zisamane gihitin, thaz sih gesto guati sulihhero ruamti. Thar uuas Krist guater, ioh selba ouh thiu sin muater, ouh man thara ladota thie iungoron, thier tho habeta. Thiu hiun uuarun filu fro, giuuerdan mohta siu es tho; 10 sie habetun thar selbon Krist, ther alles blides forista ist. Tho zigiang thes lides, ioh brast in thar thes uuines Maria thaz bihugita, ioh Kriste si iz gisageta. "Ih scal thir sagen, min kind, then hion filu hebig thing, theih mithon ouh nu uuesta: thes uuines ist in bresta. 15 Sprah tho zi iru suazo ther ira sun zeizo sconen uuorten uberal, so sun zi muater scal: "Uuib, ih zellu thir ein, uuaz drift sulih zi uns zuein? ni quam min zit noh so fram, theih ouge, uueih fon thir nam Sar so thaz irscinit, uuaz mih fon thir rinit, 20 so ist thir allan then dag thaz herza filu riuag. Thaz thu zi mir nu quati inti eina klaga es dati, mit gotkundlichen rachon scal man sulih machon." Thiu muater horta thaz tho thar si uuessa thoh in alauuar, thaz iru thiu sin guati nirzigi thes siu bati. 25 Gibot si then sar gahun, then thes lides sahun so uuas so er in giquati, iz iagiliher dati. Thar stuantun uuazarfaz, so ther in lante situ uuas, then mannon sus iouuanne sih zi uuasganne. Thaz uuarun sehs kruagi; zi thiu uuas thar ginuagi, 30 tho zi then rachon, thio druhtin uuolta machon. Thaz mez uuir ofto zellen, ioh sextari iz nennen: Odo zuiro zehanzug, thes duent buah thar gihugt; uuarun steininu thiu faz, siu mohtun uueren thes thiu baz. 35 Gibot tho selbo druhtin, siu uuazzares irfultin; thaz datun sie geuuurtig unz in obanentig. Tho quad er, thaz sie skanctin, zi themo heresten sih uuantin, ther thero thriosezzo uuas furisto gimazzo. Drank er tho, so nan lusta; er uuiht es thoh ni uuesta, 40 es uuiht ni quam imo ouh in uuan, theiz uuas fon uuazare gidan. Thie man thoh, thie thar scanktun, iz filu uuola irkantun, theiz uuazzar lutaraz uuas, tho sie fultun thiu vaz. Then uuirt er thara ladota ioh zi imo nan giholota, sih harto uuuntorota sin bi then fronisgan uuin. 45 "Sage mir nu, friunt min, uuio dati so bi then uuin, thih sus es nu inthabetos, so lango nan gisparatos? Gibit giuuelih manno, ther friunta freuuit gerno (ih uueiz, thu es innana bist), then furiston io sar zi erist. So thie man sih thanne iruuinnent ioh drunkanen biginnent: 50 so skenkit allan then dag sulih, sos iz uuesan mag. Ia gisparatos afur thu then guaton uuin unz in nu! ih scal thir ouh nu rachon, ni drenk ih thes gimachon. Thiz zeichan deta druhtin Krist mennisgon zi erist, sid er hera in uuorolt quam ioh mannes lichamon nam. 55 Er ougta sina kraft thar ioh sina guallichi, theist uuar; tho giloubtun ekordi eine thie iungoron sine.
SPIRITUALITER. Thisu selba redina, theih zalta nu hiar obana, breitit siu sih harto geistlichero uuorto; Thoh uuill ih es mit uuillen hiar ethesuuaz irzellen, thaz uuir ni uuerden einon thero goumano adeilon, 5 Thes uuazares gismeken ioh uuir then sens intheken, thaz frouuon lidi thine fon themo heilegen uuine. Fernemet sar in lihti, thaz Krist ther brutigomo si, ioh druta sine in lante zi theru bruti ginante, Thier in himilkamaru irfullit io mit gamanu 10 blidliches muates ioh euuiniges guates. Zellu ih thir ouh hiar thaz bi thia staninun faz: herza iz sint gidigano thero gotes drutthegano. Siu sint innana hol, heileges giscribes fol, mit thiu sie unsih iagilicho drenkent frauualicho 15 (Lutaran brunnon so scenkent sie uns mit uuunnon; skal iz geistlichaz sin, so skenkent sie uns then guatan uuin); Uuidar thiu ouh thanne thie man firnement alle; so mugun sie mit ruachon uns sagen in then buachon. Sehsu sint thero fazzo, the thu es uueses uuizo, 20 thaz uuerolt ist gideilit, in sehsu gimeinit. Irsuachist thu thiu uuuntar inti ellu uueroltaltar, erzelist thu ouh thia guati, uuaz iagilicher dati: Tharana maht thu irthenken, mit brunnen thih gidrenken, gifreuuen ouh thie thine mit geistlichemo uuine. 25 Ih zellu thir in alauuar: luzil drank ih es thar, luzil ih es mohta ioh gorag es gismakta; Ni thuhta mih, theih quami, thaz sulih uuin uuari, odo io in inheimon zi suazeren goumon. Nu uuill ih hiar gizellen, ein bilidi ginennen, 30 thaz thaz firstantnissi uns allen lihtera si. Druhtin kos imo einan uuini untar uuoroltmenigi, man filu mari, thaz er sin drut uuari. Gibot, thaz er irsluagi (in thiu uuas imo ginuagi) in opheres uuisun sinan einigan sun 35 In berge, the er mo zeinti; thaz er nan thara leitti, es ilti sar in gahi, thera liubi ni sehi. In imo er suazo lebeta, zi herzen er mo klebeta, uuard er mo ouh zi ruame in sinemo altduame. Uuard imo ouh thaz uuuntar zi skonen eron gidan, 40 theiz uuurti ubar uuorolt lut, thaz er bi rehte uuas sin drut. Fuart er sar tho tharasun then selbon sinan drutsun; uuolt er sar mit uuillen thaz sin gibot irfullen. Thaz kind, thaz druag thaz uuitu mite ioh er iz habeta furi niuuiht, er fon thes fater henti tho thar dot uuurti. 45 Er auur uuidorort ni uuant, er er nan fasto gibant; er suorgata thero uuorto, bi thiu skeint er iz so harto; In then alteri er nan legita, so druhtin imo sageta, thia liabun sela sina ufin thia uuitavina; Ioh es ouh ni dualti, suntar nan firbranti, 50 er al irfulti thuruh not, so druhtin selbo gibot. So er thaz suert thenita, ther engil imo hareta, er hiaz inan iruuintan; thaz kind lag thar gibuntan. Quad, er sih inthabeti, ouh uuiht imo ni daroti; ioh thaz er iz firbari, quad, thar ginuag uuari; 55 In thiu, quad, uuari follon zi erkennenne mannon, thaz er got forahta, tho er sulih uuerk uuorahta; Ioh sinero uuorto er horta filu harto, tho er in sulih thing gigiang, so nah zi herzen gifiang. Ein scaf er stantan gisah, thaz uuas zem opphere gimah; 60 er sah iz thar uuernon in bramon mit then hornon. Thaz gifiang er tho sar inti oppherota iz gote thar; uuehsal gimuati bi sines sunes guati ! So uuer thiz firneman uuolle: hera losen sie alle; ioh herazua thenke, thaz suazo er sih gidrenke. 65 Drahto io zi guate, so uuaz thir got gibiete; ili iz io irfullen mit mihilemo uuillen; Bilido io filu fram thesan heilegon man: so drinkist thu io mit uuillen thes luteren brunnen. Uuil du iz kleinor reken, in uuine gismeken: 70 fon Kriste scalt thu iz zellen, gisteist thu thaz iruuellen. Lis selbo, theih thir redion, in sinen evangelion, thar lisist thu io zi noti so samalicho dati. Lang ist iz zi saganne, uuio iz quimit al zisamane; iz mag man thoh irrenton mit kurzlichen uuorton. 75 Firnim in alauuari, thaz got ther fater uuari, ioh thaz kind eino Kristan bizeino; Then er zi tode salta bi unsih, sos er uuolta, noh themo einigen ni leip, io so Paulus giscreip; Uuio er selbo druag thaz kruzi, tho er tholta thaz uuizi, 80 ioh irstarp thare in thes cruces altare; Ther lichamo iz thulta, thaz gotnissi ni uuollta, selb so untar genon thar uuard thaz uuehsal gidan. Haftetun thie armon in thes cruces hornon, thie liuti inan thar namon, so selb thie selbun bramun; 85 Sie haftun nan mit uuunton bi unsen suaren sunton, ioh hontun nan bi herton mit iro sceltuuorton. Firnim in thesa uuisun, thaz ih thir zalta bi then sun: ni drinki thu io in uuar min alabeziron uuin. Ni tharft es drof duellen; uuil du alla uuorolt zellen, 90 sus maht thih al bithenken, in zua uuisun drenken. Thaz giscrip in rihti irfulli thu io mit mahti: so kualist thu thih ofto mit brunnen redihafto; Ioh hugi filu harto thero geistlichero uuorto: so drenkist drahta thine mit fronisgemo uuine. 95 Thiu faz thiu namun lides zuei odo thriu mez, thaz thu nimis in thin muat, uuio thie heilegun duent; Sie scribent fater ioh then sun zi heiligeru uuisun, sumes ouh, so thu uueist, then selbon heiligon geist.
CUR EX AQUA ET NON EX NIHILO VINUM FECISSET. Ni uuolt er fon niauuihti (thoh er so duan mohti, ob er thes uuolti thenken) then selbon uuin uuirken; Suntar hiaz mit uuillen thiu sehs faz gifullen uuazares thie sine, thaz uuoraht er thar zi uuine, 5 Thaz man thes io koroti: thie sehs ziti uuorolti (in guates nio ni uuangta) mit uuisduamu drankta. Tho uns uuard thiu salida so fram, er selbo in thesa uuorolt quam, thaz thiu sin geginuuerti zi salidon uns uurti: Thaz sie lisun er in rihti in thero buahstabo slihti, 10 ioh nuzzun tho thie sine, so nu uuazar ist bi uuine, Deta er iz sconara, al so zam, ioh ziarara ouh so filu fram, (uuir goum es nemen uuollen), so uuin ist uuidar brunnen. Thie zi thiu giuuizzent, zi herost ouh nu sizzent, iz ouh nu uuola uueizent ioh biscofa heizent: 15 Sie kiesent uns mit ruachon then uuin in then buachon ioh inan io gilicho uns lobont geistlicho; Sie lobont inan harto fronisgero uuorto ioh thankont es mit uuorte Kriste themo uuirte; Uuant er unsih freuuita, then guaton uuin uns sparota, 20 ther furdir uns ni uuenkit, ioh geistlicho drenkit; Thaz unsih es giluste, thera freuuida ni briste, ioh uuir zi themo guate io uuesen fastmuate!