Desiderio desideraui hoc pascha. Bigan tho druhtin redinon then selben zuelif theganon, then thar umbi inan sazun, mit imo saman azun: 'Thes muases garota ih bi thiu, thaz ih iz azi mit iu, er ih thaz uuizi thulti ioh bi iuih dot uurti: 5 Ni drinku ih rehto in uuara thes rebekunnes mera, fon themo uuahsmen furdir, thaz giloubet ir mir, Er ih iz so bithenku, mit iu saman auur drinku niuuuaz, thaz iu iz liche, in mines fater riche.' Nam er tho selbo thaz brot, bot in iz gesegenot, 10 gibot, thaz sies azin, al so sie thar sazin. 'Ir ezet', quad er, 'ana uuan lichamon minan, allen zellu ih iu thaz: thaz eigit ir giuuissaz. Nemet then kelih ouh nu zi iu, thaz drinkan deilet untar iu: thar drinket ir thaz minaz bluat, thaz iu in euuon uuoladuat. 15 Iz heilit liuto uuunta ioh managero sunta, iz ist managfaltaz thing, yrlosit thesan uuoroltring.'