CONSOLATUR DISCIPULOS DE MORTE EIUS.

Drost er sie tho uuorto			sines tothes harto, 
er iz zi thiu uuurti;			es uuarun in tho thurfti. 
'Ni siuz', quad er, 'smerza,		ni riaze ouh iuer herza; 
in got giloubet ioh in mih,		giuuisso theist gilumplih. 
5
Mines fater hus ist breit,		uuard uuola then, thara ingeit; 
ther sih thes muaz			frouuon ioh innana biscouuon! 
Thar ist in alauuari			managfalt gilari 
(hugget therero uuorto)			ioh selida managfalto. 
Uuariz allesuuar in uuar:		sliumo sageti ih iu iz sar; 
10
uuergin thaz gizami:			so ih iuih iz ni hali 
Ih faru garauuen iu sar			fronisgo iu stat thar, 
ir, thes ni missedruet,			mit mir thar iamer buet; 
Thaz, thar min geginuuerti ist,		si iamer iuer nahuuist, 
thaz ir uuizit mina fart,		thero uuego ouh uueset anauuart.'
15
Zi imo sprah tho Thomas, 		er ein thero einlifo uuas: 
'thes uueges ni birun uuir anauuart,	ouh ni uuizun thina fart; 
Girihti unsih es alles, 		uuara thu faran uuolles.' 
thaz uuara zalt er imo sar		ioh sprah ouh zi imo sus in uuar: 
'Ih bin uueg rehtes			ioh alles redihaftes, 
20
bin ouh lib inti uuar;			bi thiu ni girrot ir thar. 
Nist man nihein, thaz ist uuar,		ther queme zi themo fater sar, 
thes iaman inan gibeite,		ih inan ni leite. 
Ob ir mih irknatit,			ir sehon thaz instuantit 
ana langlicha frist,			uuiolih ouh min fater ist.'
25 Quad tho Philippus, iro ein		(thiz selba uuas imo, untar zuein,
giloubt er, unredina,			ther fater uuari furira): 
'Then fater, druhtin, einon		then laz unsih biscouuon 
(thin uuort sin ofto giuuuag);		so ist uns alles ginuag.
Nam thoh druhtin thanana		thia selbun unredina; 
30
uuant er in abuh iz instuant,		kert er mo allesuuio thaz muat. 
'So minagfalto ziti			ih mit iu bin hiar in uuorolti, 
mit muatu ir mir ni nahet		ioh mih noh nirknahet? 
So uuer so thaz iruuelle,		then fater sehan uuolle: 
thanne, thaz ni hiluh thih, 		giuuaro scouu er anan mih; 
35
Thar sihit er thaz edili		ioh sines selbes bilidi; 
giuuisso se er anan mih,		min fater ist so samalih!
Er zalt in ouh tho thar mest,		uuio ther heilego geist 
thie uuizzi in scolta meron		mit sines selbes leron; 
Niheinemo ni brusti,			ni er alla fruma uuesti, 
40
allaz uuar inti guat,			so selben gotes geist duat. 
Zalta in ouh in uuara			uuoroltliuto fara, 
arabeiti manago,			thio in tho uuarun garauuo. 
Lert er sie mit uuorton,		uuio thaz firdragan scolton; 
quad, after theru thulti		zi mammunte in iz uuurti. 
45
'Ir ni thurfut', quad, 'bi thiu;	fridu lazu ih mit iu, 
mammunti ginuagaz,			drof ni suorget bi thaz! 
Ni lazu ih iuih uueison,		ih iuer auur uuison; 
gidrostu ih iuih scioro			mit freuuidu alazioro. 
Ir birut, thaz nist uuuntar,		friunta mine suntar, 
50
druta mine in alauuar;			zi thiu so kos ih iuih sar. 
Theist gibot minaz zi iu:		ir iuih minnot untar iu, 
ioh iagilih thes thenke,		thero minnono ni uuenke!'
In tho druhtin zelita,			uuant er se selbo uuelita, 
minota sie thes nahtes			managfaltes rates. 
55
Er habet in thar gizaltan		drost managfaltan 
fon sin selbes guati,			so sliumo so er irstuanti. 
Quad, after thera fristi		in niamer sin ni brusti,
ioh sie iamer, sar thiz uuurti,		uuarin mit giuuurti 
So er se lerta tho in thera naht,	so thu thir thar lesan maht, 
60
gizoh se thar tho follon		selbo in sinan uuillon: 
Uf zi himile er tho sah			ioh selben gotes lob sprah, 
bifalah tho thie thegana		in sines fater segana; 
Thaz er mo sie gihialti,		unz er fon dothe irstuanti, 
er sie thanne santi,			in thionost sinaz uuanti.