Mystice. Manot unsih thisu fart, thaz uuir es uuesen anauuart, uuir unsih ouh biruachen inti eigan lant suachen. Thu ni bist es uuan ih uuis, thaz lant thaz heizit paradis. ih meg iz lobon harto, ni girinnit mih thero uuorto. 5 Thoh mir megi lidolih sprechan uuorto gilih, ni mag ih thoh mit uuorte thes lobes queman zi ente. Ni bist es io giloubo, selbo thu iz ni scouuo; ni mahtu iz ouh noh thanne yrzellen iomanne. Thar ist lib ana tod, lioht ana finstri, 10 engilichaz kunni ioh euuinigo uuunni. Uuir eigun iz firlazan: thaz mugun uuir io riazan, ioh zen inheimon io emmizigen uueinon. Vuir fuarun thanana noti thuruh ubarmuati; yrspuan unsih so stillo ther unser muatuuillo. 15 Ni uuoltun uuir gilos sin (harto uuagen uuir es scin): nu riazen elilente in fremidemo lante. Nu ligit uns umbitherbi thaz unser adalerbi, ni niazen sino guati: so duat uns ubarmuati. Tharben uuir nu leuues liebes filu manages 20 ioh thulten hiar nu noti bittere ziti. Nu birun uuir mornente mit seru hiar in lante, in managfalten uuunton bi unseren sunton; Arabeiti manego sint uns hiar io garauuo. ni uuollen heim uuison uuir uuanegon uueison. 25 Vuolaga elilenti harto bistu harti; thu bist harto filu suar, thaz sagen ih thir in alauuar. Mit arabeitin uuerbent thie heiminges tharbent; ih haben iz funtan in mir: ni fand ih liebes uuiht in thir; Ni fand in thir ih ander guat suntar rozagaz muat, 30 seragaz herza ioh managfalta smerza. Ob uns in muat gigange, thaz unsih heim lange, zi themo lante in gahe ouh iamar gifahe: Farames so thie ginoza ouh andara straza, then uueg ther unsih uuente zi eiginemo lante. 35 Thes selben pades suazi suachit reine fuazi; si tharer situ in manne ther tharana gange: Thu scalt haben guati ioh mihilo otmuati, in herzen io zi noti uuaro karitatL Dua thir zi giuuurti scono furiburti; 40 uuis horsam io zi guate, ni hori themo muate. Innan thines herzen kust ni laz thir thesa uuoroltlust; fliuh thia geginuuerti: so quimit thir fruma in henti. Hugi, uuio ih thar fora quad: thiz ist ther ander pad: gang thesan uueg, ih sagen thir ein: er gileitit thih heim. 45 So thu thera heimuuisti niuzist mit gilusti, so bistu gote liober, ni intratist scadon niamer.