De occisione infantum. So Herod ther kuning tho bifand, thaz er fon in bidrogan uuard, inbran er sar zi noti in mihil heizmuati. Er santa man manage mit uuafanon garauue, ioh datun se ana fehta mihila slahta: 5 Thiu kind gistuatun stechan, thiu uuiht ni mohtun sprechan, ioh uuurtun al fillorinu mithont giborinu, So sih thaz altar druag in uuar thanan unz in zuei iar: so uuit thaz geuuimez uuas, ni firliazun sie niheinaz. Thie muater thie ruzun, ioh zahari uzfluzun, 10 thaz uuinon uuas in lengi himilo gizengi. Thie brusti sie in ougtun, thaz fahs thana rouftun; nist ther io in gahi then iamar gisahi. Siu zalatun siu io ubar dag, thar iz in theru uuagun lag ioh anan themo barme, thera muater zi harme. 15 Nist uuib thaz io gigiangi in merun goringi, odo merun grunni mit kindu io giuunni. Incloub man mit then suuerton thaz kind ir then hanton, ioh zi iro leidlusti nam iz fon der brusti Ira ferah bot thaz uuib, thaz iz muasi haben lib: 20 ni funtun thia meina ginada niheina. Uuig uuas ofto manegaz ioh filu managfaltaz: ni sah man io, ih sagen thir thaz, thesemo gilichaz. Iz ni habent liuola, noh iz ni lesent scribara, thaz iungera uuorolti sulih mord uuurti. 25 In then alten euuon so saget thesan uueuuon, thar zaltaz er ubarlut ther selbo druhtines drut. Er quad, man gihorti uueinon theso dati filu hohen stimmen uuib mit iro kindon. Quad, sie thaz ni uuoltin, suntar siu sih qualtin, 30 noh drost gifahan lindo so managero kindo; Ther iro kuning iungo ni mid iz io so lango, thaz uuig er ni firbari, in thiu sin zit uuari. Er giscantaz filu fram, so er zi sinen dagon quam: tho goz er bi unsih sinaz bluat, thaz kuning ander ni duat. 35 Nu folget imo thuruh thaz githigini so managaz, thaz ther nist hiar in libe, ther thia zala irscribe.