MISSUS EST GABRIHEL ANGELUS ET RELIQUIA. Vuard after thiu irscritan sar, so moht es sin, ein halp iar, manodo after rime thria stunta zuene. Tho quam boto fona gote, engil ir himile. braht er therera uuorolti diuri arunti. 5 Floug er sunnun pad, sterrono straza, uuega uuolkono zi theru itis frono, Zi ediles frouun selbun sancta Mariun; thie fordoron bi barne uuarun kuninga alle. Giang er in thia palinza, fand sia drurenta, 10 mit salteru in henti, then sang si unz in enti; Uuahero duaho uuerk uuirkento, diurero garno, thaz deda sia io gerno. Tho sprah er erlicho ubaral, so man zi frovuun scal, so boto scal io guater zi druhtines muater: 15 'Heil, magad zieri, thiarna so sconi, allero uuibo gote zeizosto! Ni brutti thih muates, noh thines anluzzes farauua ni uuenti; fol bistu gotes ensti. Forasagon sungun fon thir saligun, 20 uuarun se allo uuorolti zi thir zeigonti. Gimma thiu uuiza, magad scinenta, muater thiu diura scalt thu uuesan eina. Thu scalt beran einan alauualtendan erdun ioh himiles int alles Iiphaftes, 25 Scepheri uuorolti (theist min arunti), fatere giboranan, ebaneuuigan. Got gibit imo uuiha ioh era filu hoha, drof ni zuiuolo thu thes Dauides sez thes kuninges. Er richisot githiuto kuning therero liuto, 30 thaz steit in gotes henti ana theheinig enti. Allera uuorolti ist er lib gebenti, thaz er ouh insperre himilrichi manne.' Thiu thiarna filu scono sprah zi boten frono, gab si imo antuurti mit suazeru giuurti: 35 'Uuanana ist iz, fro min, thaz ih es uuirdig bin, thaz ih druhtine sinan sun souge? Uuio mag iz io uuerdan uuar, thaz ih uuerde suangar? mih io gomman nihein in min muat ni birein Haben ih gimeinit, in muate bicleibit, 40 thaz ih einluzzo mina uuorolt nuzzo.' Zi iru sprah tho ubarlut ther selbo druhtines drut arunti gabaz ioh harto filu uuahaz: 'Ih scal thir sagen, thiarna, racha filu dougna: salida ist in euuu mit thineru selu. 45 Sagen ih thir einaz: thaz selba kind thinaz, heizit iz scono gotes sun frono. Ist sedal sinaz in himile gistataz. kuning nist in uuorolti, ni si imo thiononti; Noh keisor untar manne, ni imo geba bringe 50 fuazfallonti int inan erenti. Er scal slnen druton thrato gimunton; then alten Satanasan uuilit er gifahan: Nist in erdriche thar er imo io instriche, noh uuinkil undar himile thar er sih ginerie. 55 Fliuhit er in then se, thar giduat er imo uue, giduat er imo fremidi thaz hoha himilrichi. Thoh habet er imo irdeilit ioh selbo gimeinit, thaz er nan in beche mit ketinu zibreche. Ist ein thin gisibba reues umberenta, 60 iu manegeru ziti ist daga leitenti: Nu ist siu giburdinot thes kindes so diures so furira bi uuorolti nist quena berenti. Nist uuiht, suntar uuerde, in thiu iz got uuolle, noh thaz uuidarstante druhtines uuorte.' 65 'Ih bin', quad siu,' gotes thiu zi erbe giboraniu, si uuort sinaz in mir uuahsentaz!' Uuolaga, otmuati! so guat bistu io in noti! thu uuari in ira uuorte zi follemo antuurte. Druhtin kos sia guater zi eigeneru muater; 70 si quad, si uuari sin thiu zi thionoste garauuiu. Engil floug zi himile, zi selb druhtine; sagata er in frono thaz arunti scono.