DE CANTICO SANCTAE MARIAE

Tho sprah sancta Maria,		thaz siu zi huge habeta
(si uuas sih blidenti		bi thaz arunti). 
'Nu scal geist miner		mit selu gifuagter, 
mit lidin lichamen		druhtinan diuren. 
5
Ih frauuon druhtine;		alle daga mine 
freuu ih mih in muate		gote heilante. 
Uuant er otmuati in mir		uuas scouuonti; 
nu saligont mih alle		uuorolt io bi manne. 
Mahtig druhtin,			uuih namo siner, 
10
det er uuerk mariu		in mir armeru; 
Fon anagenge uuorolti		ist er ginadonti, 
fon kunne zi kunne,		in thiu man nan irkenne. 
Det er mit giuuelti		sineru henti, 
thaz er ubarmuati		gisciad fon ther guati;
15
Fona hohsedale			zistiaz er thie riche, 
gisidalt er in himile		thie otmuatige; 
Thie hungorogun muadon		gilabot er in euuon, 
thie odegun alle 		firliaz er itale. 
Nu intfiang druhtin		drutliut sinan, 
20
nu uuilit er ginadon		then unsen altmagon; 
Thaz er allo uuorolti		zi in uuas sprechenti 
ioh io giheizenti,		nu habent sie iz in henti'.
Uuas siu after thia mit iru sar	   thri manotho thar, 
so fuar si zi iro selidon	mit allen salidon. 
25
Nu fergomes thia tharnun	selbun sancta Mariun, 
thaz si uns allo uuorolti	si zi iru sune uuegonti. 
Iohannes, druhtines drut,	uuilit es bithihan, 
thaz er uns firdanen		giuuerdo ginadon.