INVOCATIO SCRIPTORIS AD DEUM. Vuola, druhtin min, ia bin ih scalc thin: thiu arma muater min eigan thiu ist si thin. Fingar thinan dua anan mund minan, then ouh hant thina in thia zungun mina, 5 Thaz ih lob thinaz si lutentaz, giburt sunes thines, druhtines mines; loh ih biginne redinon, uuio er bigonda bredigon, thaz ih giuuar si harto thero sinero uuorto, loh zeichan, thiu er deda tho, thes uuir birun nu so fro, 10 ioh uuio thiu selba heili nu ist uuorolti gimeini. Thaz ih ouh hiar giscribe, uns zi rehtemo libe, uuio firdan er unsih fand, tho er selbo tothes ginand, loh uuio er fuar ouh thanne ubar himila alle, ubar sunnun lioht ioh allan thesan uuoroltthiot; 15 Thaz ih druhtin thanne in theru sagu ni firspirne, noh in themo uuahen thiu uuort ni missifahen; Thaz ih ni scribu thuruh ruam, suntar bi thin lobduam, thaz mir iz iouuanne zi uuize nirgange. Ob iz zi thiu thoh gigeit thuruh mina dumpheit, 20 thia sunta, druhtin, mino ginadlicho dilo; Uuanta, ih zellu thir in uuan, iz nist bi balauue gidan, ioh (ih iz ouh bimide), bi niheinigemo nide. Then uuan zell ih bi thaz, thaz herza uueist thu filu baz; thoh iz bue innan mir, ist harto kundera thir. 25 Bi diu du io, druhtin, ginado follicho min, hugi in mir mit krefti dera thinera giscefti! Hiar hugi mines uuortes thaz thu iz harto haltes, gizauua mo firlihe ginada thin, theiz thihe. Ouh ther uuidaruuerto thin, ni quem er innan muat min, 30 thaz er mir hiar ni derre, ouh uuiht mih ni gimerre. Unkust rumo sinu, ioh nah ginada thinu! irfirrit uuerde balo sin; thu druhtin rihti uuort min! Al gizungilo, thaz ist thu druhtin eino es alles bist; uueltis thu thes liutes ioh alles uuoroltthiotes. 35 Mit thineru giuuelti sie dati al sprechenti, ioh, salida, in gilungun thiu uuort in iro zungun; Thaz sie thin io gihogetin, in euuon iamer lobotin, ioh sie thih irknatin inti thionost thinaz datin. Sar thu uzar theru menigi sceidist thin githigini, 40 so laz mih, druhtin min, mit druton thinen iamer sin; loh theih thir hiar nu ziaro in mina zungun thiono ouh in al gizungi, in thiu thaz ih iz kunni, Thaz ih in himilriche thir, druhtin, iamer Iiche ioh iamer freuue in rihti in thiheru gisihti 45 Mit engilon thinen, thaz nist bi uuerkon minen, suntar rehto, in uuaru, bi thiheru ginadu. Thu hilphis io mit krefti theru thinera giscefti: dua huldi thino ubar mih, thaz ih thanne iamer lobo thih, Thaz ih ouh nu gisido thaz, thaz mir es iamer si thiu baz, 50 theih thionost thinaz fulle, uuiht alles io ni uuolle, loh mir io hiar zi libe uuiht alles io ni klibe, ni si, druhtin, thaz thin uuillo ist, thu io ginadiger bist Thih bittu ih mines muates, thaz mir queme alles guates in euuon ginuagi; ioh zi druton thinen fuagi. 55 Thaz ih iamer, druhtin min, mit themo troste megi sin, mit themo guate ih frauuo thar mina daga inti ellu iar: Fon iare zi iare ih iamer frauuo thare, fon euuon unz in euuon mit then saligen selon!