CUR DOMINUS IGNOMINIAM CRUCIS ET NON ALIAM PRO NOBIS MORTEM PERTULERIT. Ist filu manno uuuntar, thaz zellu ih hiar nu suntar, ziu druhtin hiar in uuoralti thes kruzes tod iruuelti, Tho er unsih hiar so nerita, fon fianton irretita, nam uzar harten banton, fon fianto hanton; 5 Thaz sines selben guati thaz eina uuas gimuati, in sulicheru noti er uns ginadoti. Uuir uuizun ana zuuival, thaz er thes uuialt ubar al, er bi unsih tod thulti, so uuio so er selbo uuolti; Ob avur uuir iz ahton, ioh uuola iz al bidrahton, 10 thanne ist uns ouh thaz uuuntar ein ginada suntar. Mit fiuru sie nan brantin, mit uuazaru ouh irqualtin, odo ouh mit steinonne: mit uuiu segenotis thu thih thanne? Uns ist fruma in thiu gizalt ioh segan filu managfalt, salida zi libe, thaz scado uns hiar ni klibe. 15 Ist uns thaz girusti, brunia alafesti, ioh ist uns helm ouh ubar thaz ioh uuafan alauuassaz. Nist uuiht in themo boume, thaz friuntilih giloube, thes mannilih giuuis si, thaz thar ubbiges si. Thes kruces horn thar obana thaz zeigot uf in himila; 20 thie arma ioh thie henti thie zeigont uuoroltenti, Ther selbo mittilo boum ther scouuot thesan uuoroltfloum (es ist zi zellenne ginuag), ther then lichamon druag. Nist uuiht in themo boume, thaz friuntilih giloube, thes mannilih giuuis si, thaz thar ubbiges si. 25 Thaz sih es thara uuentit, thaz innan erdu stentit, nim gouma, uuaz thaz meinit, theiz untar erda zeinit: Mit thiu ist thar bizeinit, theiz imo ist al gimeinit in erdu ioh in himile inti in abgrunte ouh hiar nidare. Bi thiu nist in themo boume, thaz mannilih giloube, 30 thes friuntilih giuuis si, thaz thar ubbiges si. Leg iz nidarhaldaz, iz zeigot imo iz allaz fiar halbun umbiring, allan thesan uuoroltring; Ellu, zellu ih thir, thiu thing (theist avur therer uuoroltring), ist iauuiht mera ouh furdir, theist sin, giloubi thu mir. 35 Nist avur in themo boume, thaz friuntilih giloube, thes mannilih giuuis si, thaz thar ubbiges si. Liggez, sagen ih thir thaz, odo ist iz ufhaldaz: giuuisso uuizist thu thaz, io zeigot imo iz allaz; Ellu thisu uuuntar zeigot imo iz suntar, 40 iz rihtit uuoroltenti zi sines selbes henti, Bi diu nist uuiht in themo boume, thaz mannilih giloube, thes friuntilih giuuis si, thaz thar ubbiges si. Uuara thenkistu, les! uuio meg iz uuesan alles? then ruarta mit theru lichi, ther rihtit himilrichi; 45 Bigoz inan zi guate mit sines selbes bluate, er salta (uueist es mera) in themo sina sela. Bi diu nist in themo boume, thes mannilih giloube, thes friuntilih giuuis si, thaz thar ubbiges si.