DE DIE JUDICII. Thes habet er ubar uuoroltring gimeinit einaz dagathing, thing filu hebigaz, zi sorganne eigun uuir bi thaz. Thir zellu ih hiar ubarlut: nist niheinig siner drut, thes allesuuio biginne, ni er queme zi themo thinge. 5 Quement thara ouh thanne thie uuenegun alle, thie hiar gidatun follon then iro muatuuillon. Zi zellenne ist iz suari; nist ther fon uuibe quami (es irquimit muat min), nub er thar sculi sin; Ni sie sculin herton thar iro dati renton 10 al io giuuisso umbiring, theist filu iamarlichaz thing! Uuard uuola in then thingon thie selbun mennisgon, thie thar thoh bigonoto sint sichor iro dato; In thie thoh ubil thanne nist uuiht zi zellenne, mit thiu sih thoh biuuerien ioh ethesuuio gingen! 15 Uuanta es nist laba furdir, thaz giloubi thu mir, er uuergin megi ingangan (uuerd er thar bifangan), Nub er sculi thuruh not (uuerd er thar biredinot) thulten thanne in euuon thes helliuuizes uueuuon. Uuard uuola in then thingon thie selbun mennisgon, 20 thie thar thoh bigonoto sint sichor iro dato! Uueist thu, uuio bi thia zit ther gotes forasago quit? er zelit bi thaz selba thing, thaz thar si mihilaz githuing; In imo man thar lesan mag, theiz ist abulges dag, arabeito, quisti ioh managero angusti; 25 Thaz ist ouh dag hornes ioh engilliches galmes, thie blasent hiar in lante, thaz uuorolt ufistante; Theist dag ouh nibulnisses ioh uuintesbruti leuues, thiu zuei firuuazent thanne thie suntigon alle; Hermido ginoto ioh uuenagheiti thrato 30 (uuaz mag ih zellen thir hiar mer?) - thes ist ther dag al foller! Lasi thu io thia redina, uuio druhtin threuuit thanana? thar duat er zi gihugte, er thanne himil scutte. Uuer ist manno in lante, ther thanne uuitharstante, thanne er iz zi thiu gifiarit, thaz sih ther himil ruarit; 35 Thanne er mit giuuelti ist inan faltonti (queman mag uns thaz in muat!), so man sinan liuol duat! Nist ther dag sumirih dagon anderen gilih, thaz sar man in githankon thar megi uuiht biuuankon; Giborganero dato ni pligit man hiar nu thrato, 40 sih ougit thar ana uuank ther selbo luzilo githank. Uuard uuola mennisgon in then selben thingon, thie thar thoh bigonoto sint sichor iro dato; In thie thoh ubil thanne nist uuiht zi zellenne, mit thiu sih thoh biuuerien ioh ethesuuio ginerien! 45 Ni losent thar in noti gold noh diuro uuati, ni hilfit gotouuebbi thar, noh thaz silabar in uuar; Ni mag thar manahoubit helfan hereren uuiht, kind noh quena in uuare, sie sorgent iro thare; Odo iauuiht helphan thanne themo filu richen manne, 50 sie sint al ebanreiti in theru selbun arabeiti. Giuuisso thaz ni hiluh thih: thar sorget mannilih bi sih, bi sines selbes sela; nist uuiht in thanne mera. Skalka ioh thie riche thie gent thar al giliche, ni si thie thar bi noti gifordoront thio guati. 55 Uuard uuola in then thingon thie selbun mennisgon, thie thar thoh bigonoto sint sichor iro dato! Thar nist miotono uuiht ouh uuehsales niauuiht, thaz iaman thes giuuise, mit uuihtu sih irlose; Ni uuari thu io so richi ubar uuoroltrichi, 60 thoh thu es thar biginnes; ther scaz ist sines sindes. Uuanta druhtin ist so guat, ther thaz urdeili duat; er duat iz selbo, ih sagen thir ein, ander botono nihein; Bi thiu ist uuola in then thingon thie selbun mennisgon, thie thar thoh bigonoto sint sichor iro dato; 65 In thie thoh ubil thanne nist uuiht zi zellenne, mit thiu sih thoh biuuerien ioh ethesuuio ginerien!