De qualitate caelestis regni et inaequalitate terreni. Vuolt ih hiar nu redinon (ni mag iz thoh irkoboron), uuio managfalt gilari in himilriche uuari, Mit thiu druhtin lonot themo thi imo thionot, er thara ouh thie sine leitta, then er hiar forna irdeilta; 5 Uuio uuunnosamo guati ioh minna so gimuati thar untar then ist iamer, bi thaz hiar thultent thaz ser; Vuio thar thio fruma niezent thie hiar thia sunta riezent, sih hiar io thara liezent thie sih mit thiu bigiazent; Ouh zellen thio arabeiti, thie uuir hiar thulten noti 10 in irthisgen thingon, thoh uuir iz harto minnon. Biscirmi uns, druhtin guato, thero selbun arabeito lichamon ioh sela in thines selbes era! Thuruh thino guati dua uns thaz gimuati, uuir mit ginadon thinen thesa arabeit bimiden! 15 Thaz uuill ih hiar gizellen glauen mannen allen, thaz si in mer gimuati thiu himilriches guati. Thes uuolt ih hiar biginnan: ni mag iz thoh bibringan, thoh uuille ih zellen thanana etheslicha redina. Nist man nihein in uuorolti, ther al io thaz irsageti, 20 allo thio sconi, uuio uuunnisam thar uuari, Odo ouh suuigenti es mannes muat irhogeti in sinemo sange odo ouh in hiuuilonne, Odouh thaz bibrahti, in herzen es irthahti, sin era iz io gihorti, od ouga irscouuoti, 25 Uuio harto fram thaz guat ist, thaz uns gibit druhtin Krist thaz guates uns er garota, er er uuorolt uuorahta. Thara leiti, druhtin, mit thines selbes mahtin zi themo sconen libe thie holdun scalka thine, Thaz uuir thaz mammunti in thinera munti 30 niazen uns in muate in euuon zi guate! Nist thaz sulih redina, thoh sagent se alle thanana, thie hiar thaz iruuellent, thaz se thara uuollent. Thaz duit in iamaragaz muat ioh thes himilriches guat, thes himilriches sconi ioh allaz sin gizami. 35 Thaz duit filu manne, thaz er hiar minnot gerne, mit minnu thes giflizit, in muat so diofo lazit. Thaz uuizist thu in giuuissi, thoh imo iz abuuertaz si, ni mag ouh mit then ougon zi geginuuert iz scouuon: Yruuachet er thoh filu frua, ioh habet thaz muat sar tharzua, 40 suftot sinaz herza: thaz duit thes liobes smerza. Thoh imo iz abuuertaz si, thoh hugit er io, uuar iz si, habet sinan gingon io zi thes liebes thingon. So duent thie gotes thegana: sie uuizun thaz guat hiar obana, in himilriches hohi thia gotes guallichi: 45 Thara suftent sie zua ioh uuachent muates filu frua, thaz muat ist in io tharasun: ni mugun sih freuuen herasun. Si erhuggent Kristes uuortes ioh liobes managfaldes, biginnent thara io flizan (er habet in iz giheizan), Biginnent thara io huggen, ginada sina io thiggen; 50 sie fergont druta ouh sine thes liebes in nirzihe, Thaz muazin sih thes frouuon ioh innana biscouuon. thes uuillo sin io uualte, zi lange uns iz ouh ni alte! Thes thigit uuorolt ellu, thes ih thir hiar nu zellu, thiz scal sin io thes githig, ther uuilit uuerdan salig, 55 Thaz ist in thar in libe giheizan zi liebe, zi droste in iro muate mit managemo guate. Thara leiti, druhtin, mit thines selbes mahtin zi themo sconen libe thie holdun scalka thine, Thaz uuir thaz mammunti in thinera munti 60 niazen uns in muate in euuon zi guate! Eigun iz giuueizit thie martyra man heizit, thaz thar in anauuani ist harto manag sconi; loh offonotaz iro muat, thaz thar ist harto manag guat, tho sie hiar thaz biuuurbun, bi thia selbun sconi irsturbun. 65 Ni namun thia meina uuafanes gouma, liuto fillennes noh fiures brennennes: In muate uuas in genaz mer, thanne thaz managfalta ser, thanne in thera fristi thes lichamen quisti. Uuurtun in in note thie lichamon dote; 70 thio sela filu riche in themo hohen himilriche. Duemes uuir ouh uns in muat thaz filu managfalta guat, uuir tharzua ouh huggen, thes himilriches thiggen! Thes emmizigen fergon gihugtlichen sorgon mit mihilen minnon hiar untar uuoroltmannon! 75 Flihemes thio ubili, thiu unsih geit hiar ubiri, ilemes gidroste zi himilriche irloste! Vns klibent hiar in rihti manage ummahti, thurst inti hungar: thiu ni derrent uns thar. Biscirmi uns druhtin guato, therero arabeito 80 lichamon ioh sela in thines selbes era! Thuruh thino guati dua uns thaz gimuati, uuir mit ginadon thinen thesa arabeit bimiden! Vns ist leid hiar managaz, thorot ni sorgen uuir bi thaz; manago angusti, thar eigun uuir gilusti; 85 Thiz ist todes giuualt, thar ist lib einfalt, uuanta himilrichi theist lebentero richi. Ni frauuont thar in muate, ni si einfalte thie guate, thie hiar io datun thuruh not thaz euangelio gibot, Thie hiar io gerno irfultun thaz in thio buah gizaltun, 90 ther uuizod ginoto: giniezent sies thar drato. Hiar ist io uueuuo ioh allo ziti sero ioh stunta filu suaro (thaz uuizist thu giuuaro), Ummezzigaz ser, thaz ni ubaruuinten uuir mer, ni si oba iz quame uns muadon fon druhtines ginadon. 95 Biscirmi uns, druhtin guato, therero arabeito lichamon ioh sela in thines selbes era! Thuruh thino guati dua uns thaz gimuati, uuir mit ginadon thinen thesa arabeit bimiden! Ilemes io hinana: uuir fuarun leider thanana, 100 fon paradises henti in suaraz elilenti, Fon himilriches suazi in iamarlichaz uuizi, in thiz irthisga dal, firlurun garo genaz al, In thiz dal zaharo, thes fuelen uuir nu suaro, in thesses uueinonnes last, thes uns furdir ni brast. 105 Biscirmi uns, druhtin guato, therero arabeito lichamon ioh sela in thines selbes era! Thuruh thino guati dua uns thaz gimuati; uuir mit ginadon thinen thesa arabeit bimiden! Uuir birun zi ummezze hiar emmizen mit hazze, 110 in suntono sunftin mit grozen ungizunftin: Thaz duat uns ubiluuillo, thes sint thio brusti uns follo, ioh ubilmuat ubar thaz, giuuisso uuizist du thaz, loh ouh giuuisso ana uuank harto nidiger githank, haz unses muates: bi thiu tharben uuir thes guates. 115 Biscirmi uns, druhtin guato, therera arabeito lichamon ioh sela in thines selbes era! Thuruh thino guati dua uns thaz gimuati; uuir mit ginadon thinen thesa arabeit bimiden! Ist thorot ana zuiual thiu bruaderscaf ubaral, 120 Caritas thiu diura, thiu buit thar in uuara Mit allen giziugon, thes ist si harto giuuon; uuillo iz al firfahit, ther sih hiar iru nahit. Adeilo thu es ni bist, uuio in buachon siu gilobot ist, uuio mihil gimuati sint allo thio iro guati. 125 Buent ouh gimuato zua suester iro guato, reht inti frithu thar: uuizist thaz in alauuar. Nist man, thoh er uuolle, ther thaz gifuari irzelle, ioh uuio sih man thar frouuent, thar ellu thiu thriu buent. Thara leiti, druhtin, mit thines selbes mahtin 130 zi themo sconen libe thie holdun scalka thine, Thaz uuir thaz mammunti in thinera munti niazen uns in muate in euuon zi guate! Ni maht auur thaz gimachon, thara ingegin rachon, uuio managfalto uuunta hiar thulten thuruh sunta. 135 Frost, ther umblider ist, ther ni gibit thir thia frist, hizza ginoto suarlichero dato. Nist ouh in erdriche, nub er hiar irsiache, nub er io innan thes sih lade forahtennes. Ni uuirthit ouh innan thes, zi stunton brest imo thes, 140 ni in iungistemo thinge thoh elti nan, githuinge, Thiu mo allaz liob inselzit ioh mahto nan gihelzit, duit imo uuidarmuati thia iugundlichun guati; Leident imo in brusti thio ererun gilusti, ist mera imo in theru brusti thes huasten angusti. 145 Biscirmi uns, druhtin guato, therero arabeito Lichamon ioh sela in thines selbes era! Thuruh thino guati dua uns thaz gimuati, uuir mit ginadon thinen theso arabeit bimiden! Hiar suidit manne ana uuank io ther ubilo githank 150 (in herzen ioh in muate ni firsehent sih zi guate), Suht ioh suero manager (thes giuuuagun uuir er): ni bristit thoh in thes thiu min, ni sie sih hazzon untar in, Ni sie sih io muen mit managemo uueuuen: ni duent in thiu halt thoh in muat, thaz ther diufal in thaz duat, 155 Nihein ouh thes githenkit, uuio er se emmizigen skrenkit ioh thes ouh ni gisulkhit, sie emmizen bisuikhit. Biscirmi uns, druhtin guato, therero arabeito lichamon ioh sela in thines selbes era! Thuruh thino guati dua uns thaz gimuati, 160 uuir mit ginadon thinen theso arabeit bimiden! Therero arabeito tharbent io ginoto thie hiar thes biginnent, zi himilriche thingent. Theist al ander gimah, so ih hiar foma gisprah, theist al einfoltaz guat: gilaz thir thara thinaz muat. 165 Einfoltu uuunna so scinit thar so sunna, sie furdir thar niruuolkent then hiar io uuola thenkent, Thio fruma then thar bluent, thie sih zi thiu hiar muent, then thaz hiar giagaleizent, mit hursgidu ouh giuueizente Thaz sie thara al thaz iar ladot mihil iamar 170 loh iro lib allaz, thie hiar sorgent bi thaz. Thara leiti, druhtin, mit thines selbes mahtin zi demo sconen libe thie holdun scalka thine, Thaz uuir thaz mammunti in thinera munti niazen uns in muate in euuon zi guate! 175 Thar ist sang sconaz ioh mannon seltsanaz, sconu lutida ubar dag, thaz ih irzellen ni mag; Thaz ist in girihti fora druhtines gisihti, selbe scouuot er thaz: bi thiu ist iz so sconaz. Thu horist thar ana uuank io thero engilo sank, 180 mit thiu se then uuarbon lobont druhtin selbon, Mit thiu se druta sine duent iamer filu blide, iamer frauuamuate zi allemo guate. Thara leiti, druhtin, mit thines selbes mahtin zi themo sconen libe thie holdun scalka thine, 185 Thaz uuir thaz mammunti in thinera munti niazen uns in muate in euuon zi guate! Thir al thar scono hillit thaz musica gisingit, allaz thir zi liebe zi themo euuinigen libe Io then euuinigan dag, then man irzellen ni mag: 190 gisteit thir al redinon mit euuinigen freuuidon. Ni mag man nihein irredinon, uuio thar ist gotes theganon, thie arabeiti thultun ioh sinan uuillon fultun. Thara leiti, druhtin, mit thines selbes mahtin zi themo sconen libe thie holdun scalka thine, 195 Thaz uuir thaz mammunti in thinera munti niazen uns in muate in euuon zi guate! Sih thar ouh all ruarit thaz organa fuarit, lira ioh fidula ioh managfaltu suegala, Harpha ioh rotta ioh thaz io guates dohta, 200 thes mannes muat noh io giuuag, thar ist es alles ginuag. Thaz spil, thaz seiton fuarent ioh man mit hanton ruarent, ouh mit blasanne, thaz horist thu allaz thanne. Thaz niuzist thu iagilicho thar scono geistlicho: iz ist so in alauuari in himile gizami. 205 Thara leiti, druhtin, mit thines selbes mahtin zi themo sconen libe thie holdun scalka thine, Thaz uuir thaz mammunti in thinera munti niazen uns in muate in euuon zi guate! Allo uuunna, thio sin odo io in gidrahta quemen thin, 210 thaz niuzist du in muate iamer thar mit guate, Iamer mit liebe (thin herza mir giloube), thaz guata managfalta, thaz ih thir hiar nu zalta. Niuzit thar in uuara salida thin sela, iamer mammunti ioh euuinig gimuati, 215 Euuiniga suazi, bimidit allaz uuizi, alles muates sorgen, si blidit sih thar follon; Blidit sih thar iamer ana sorgun ioh ser, ioh ana leidogilih, giuuisso thaz ni hiluh thih. Thara leiti, druhtin, mit thines selbes mahtin 220 zi themo sconen libe thie holdun scalka thine, Thaz uuir thaz mammunti in thinera munti niazen uns in muate in euuon zi guate! Vuari in mir ginoto manage thusunt mundo, spracha so gizami, thaz enti thes ni uuari: 225 Ni moht ih thoh mit uuorte thes lobes queman zente alles mines libes frist, uuiolih thar in lante ist. Thu uuirdist mir giloubo, selbo thu iz biscouo, theiz duit thia mina redina, harto filu nidira; loh scouuos, uuizzist du thaz, liob filu managaz, 230 liobes harto ginuag, thes ih noh hiar ni giuuuag. Thara leiti, druhtin, mit thines selbes mahtin zi themo sconen libe thie holdun scalka thlne, Thaz uuir thaz mammunti in thinera munti niazen uns in muate in euuon zi guate! 235 Uuio mag ih thaz iruuellen, thaz minu uuort irzellen himilriches dohta, thaz uuorolt al ni mohta, Thaz thie alle er nirzelitun, tharazua doh thingotun ioh ouh zi alauuare mit muate uuarun thare? Vuaz scolt ih thanne, bin sunta untar manne, 240 tho ebanlih ni mohta gizellen thaz dohta? Thara leiti, druhtin, mit thines selbes mahtin zi themo sconen libe thie holdun scalka thine, Thaz uuir thaz mammunti in thinera munti niazen uns in muate in euuon zi guate! 245 Nist themo thar in lante tod io thaz inblante (thiu freuui ist in gimeino), thaz sinan friunt biuueino, Odo ouh thaz insizze, thaz inan uuiht gilezze (theist in ouh gimeini) thera sinera selbun heili, Odo imo tod so gienge, thaz got io thaz gihenge, 250 thaz in themo riche iaman sar irsieche; Quistu bi thio siuchi, odo er sar unfrauuer si, odo inan uuiht sar smerze, thaz er es thoh gigrunze, Odo iouuiht ander suntar guat, ruere mo thaz blida muate leid odo smerza, thaz sinaz frauua herza. 255 Thara leiti, druhtin, mit thines selbes mahtin zi themo sconen libe thie holdun scalka thine, Thaz uuir thaz mammunti in thineru munti niazen uns in muate in euuon zi guate! Ni uuirthit in themo erbe, thaz man thihein irsterbe, 260 tod inan bisuikhe in themo selben riche. Giuuisso sagen ih thir ein, thar nirstirbit man nihein, bi thiu ni uuirdit ouh in uuar, thaz man nan bigrabe thar, Odo iauuiht thes man thar bige, thes zi tode gige, zi themo thionoste: sie sint thar al gidroste. 265 Then tod then habet funtan thiu hella ioh firsluntan, diofo firsuolgan ioh elichor giborgan. Thoh ouh thaz ni uuari, thaz uuari thoh io sconi, heili, uuizistu thaz, ana enti theheinaz. Thara leiti, druhtin, mit thlnes selbes mahtin 270 zi themo sconen libe thie holdun scalka thine Thaz uuir thaz mammunti in thineru munti niazen uns in muate in euuon zi guate! Thar blyent thir io lilia inti rosa, suazo sie thir stinkent ioh elichor niruuelkent 275 Thia bluat, thia erda fuarit, ioh akara alle ruarit, thia sconi zi uuare, thia sihistu alla thare. Ther stank, ther blasit thar in muat io thaz euuiniga guat, suazi filu managa in thia gotes thegana. In thie gotes liobon mit suazin ginuagon, 280 in thie druta sine: uuard uuola sie mit libe, Thaz sie giboran uuurtun, tho sie sulih funtun, ioh sie in thesa redina niazent iamer freuuida! Thara leiti, druhtin, mit thines selbes mahtin zi themo sconen libe thie holdun scalka thine, 285 Thaz uuir thaz mammunti in thinera munti niazen uns in muate in euuon zi guate! Vbar thiz allaz so ist uns suazista thaz, uuir unsih thes thar frouuon, selbon druhtin scouon, Sines selbes sconi ioh allaz sin gizami 290 iamer in then mahtin bi sinen eregrehtin. Theist thiu uuunna ioh thaz guat, thaz blasit lib uns in thaz muat, theist al fon themo brunnen, thaz uuir hiar guetes zellen. Sehen ouh thar then drost, thero engilo thionost, uns thar io lib bibringit thaz iagilicher singit. 295 Thira leiti, druhtin, mit thines selbes mahtin zi themo sconen libe thie holdun scalka thine, Thaz uuir thaz mammunti in thineru munti niazen uns in muate in euuon zi guate!