Oratio. Giuuerdo uns geban, druhtin, mit thines selbes mahtin, uuir unsih muazin bliden mit heilegon thinen! Mit in uuir muazin niazan (thaz habest du uns giheizan) thesa selbun uuunna, thia uuir hiar scribun forna. 5 Erdun inti himiles inti alles fliazentes, fehes inti mannes, druhtin bist es alles. Uuir birun, druhtin, alle thin: ni laz queman thaz io in muat min, theih hiar gidue in riche uuiht thes thir ni liehe. Giboran uuir ni uuurtun, er thino mahti iz uuoltun, 10 steit ouh unser enti in thines selbes henti. Ist uns in thir giuuissi ouh thaz irstantnissi, thaz unser stubbi fulaz uuerde auur sulih, soso iz uuas. Thu uueltist ouh ana thes thes selben urdeiles, rihtis selbo thu then dag, then man biuuankon ni mag. 15 Nu iz allaz, druhtin, thin ist, ginado bi unsih, so thu bist, leiti unsih in richi thin, thoh uuir es uuirdig ni sin. Druhtin, allesuuio ni dua, mih io fuagi tharazua, thaz ih mih untar thinen iamer muazi bliden, Theih thar thih lobo ubaral, so man druhtinan scal, 20 allen kreftin minen mit heilegon thlnen, Vuir thina geginuuerti niazen mit giuuurti, ioh sin thih saman lobonti allo uuorolt uuorolti. Amen.