Conclusio voluminis totius. Selben Kristes stiuru ioh sinera ginadu bin nu zi thiu gifierit, zi stade hiar gimierit; Bin nu mines uuortes gikerit heimortes ioh uuill es duan nu enti, mit thiu ih fuar ferienti. 5 Nu uuill ih thes giflizan, then segal nitharlazan, thaz in thes stades feste min ruadar nu gireste. Bin gote helphante thero arabeito zi ente, thes mih friunta batun (in gotes minna iz datun), Thes sie mih batun harto selben gotes uuorto, 10 thaz ih giscrib in unser heil, euangeliono deil, Thaz ih es bigunni in unseraz gizungi, ih thuruh got iz dati, soso man mih bati. Ni moht ih thaz firlougnen, nub ih thes scolti goumen, thaz ih al dati, thes karitas mih bati; 15 Uuanta sie ist in uuar min druhtines drutin, ist furista innan huses sines thionostes. Thes selben thionostes giuualt thaz gengit thuruh ira hant: nist es uuiht in thanke, mit iru man iz ni uuirke. Nu ist iz, so ih redinon, mit selben Kristes segenon, 20 mit sinera giuuelti braht anan enti, Giscriban, so sie batun, thaz iro minna datun, bruaderscaf ouh diuru: thaz sagen ih thir zi uuaru. Ih hiar nu fergon uuille gotes thegana alle, alle holdon sine ioh liabe friunta mine: 25 Si fruma in thesen uuerkon, thaz sies gote thankon, thaz sie thaz iruuellen, gotes gift iz zellen, Sinera mahti allaz thaz gidrahti, imo, so ih zellu, thiu selbun uuort ellu. Si thar thaz ni dohta, so mir giburren mohta, 30 zellet thio gimeiti minera dumpheiti, Mines selbes ubili, thaz ih io uuard so frauili, ioh minera argi filu fram, thaz ih es gouma ni nam, Thaz ih in thesen redion ni lugi in theuangelion, thaz ih mir liaz so umbiruah thio mines druhtines buah. 35 Thero selbun missidato thig ih, druhtin, thrato ginada thina in uuara: uues mag ih fergon mera? Ther holdo thin ni mide, nub er iz thana snide ioh er iz thana scerre, thaz ih hiar ni merre. Zi thiu thaz guati sine thes thiu baz hiar scine 40 ioh man uuizzi follon in thiu then guatan uuillon. Vuant er thaz guata minnot ioh hiar iz lisit thuruh got, thaz arga hiar ouh midit ioh iz thana snidit, Noh thuruh eina lugina ni firuuirfit al thia redina, noh thuruh ungiuuara min ni lazit thia fruma sin: 45 Suntar thaz giscrib min uuirdit bezira sin, buazent sino guati thio mino missodati. So eigun dati sine Ion fon truhtine, galt filu follon thuruh then guatan uuillon, Uuant er thaz ubila firmeid ioh iz garo thana sneid: 50 thaz guata steit gihaltan ioh mag sih baz giuualtan. Sus bi thesa redina so duent thie gotes thegana, sie uuirkent thiz gimuati thuruh thio iro guati; Sus duent thie io alle thes guaten uuillen folle, thie selbun druta sine ioh liebe friunta mine. 55 Ih uueiz ouh, thaz thu irkannist ioh thih iz unfarholan ist, uuio afur iogilicho duit ther min gilicho. Then ruarit io thiu smarza (thaz duit imo ubilherza), er scouuot zi themo guate soragemo muate. Iz ruarit sino brusti sar zi thara fristi 60 mit mihilen riuon, so er iz biginnit scouon. Er bieget zemo guate, ist ubilo imo in muate, uuolt er sar then uuilon gomo iz firdilon. Nist imo thar ouh follon thuruh then argan uuillon, suntar er thaz grubilo, finthit er thar ubilo, 65 loh uuilit sulichero iagilih, theiz allaz si so samalih: biginnent fram thaz rachen, thaz sie thaz guata theken, Luagent io zemo argen, thaz sie genaz bergen, thaz siez io bihellen mit argemo uuillen. Iz sprichit ouh giuuaro Hieronimus ther maro, 70 giuuuag er uuortes sines thes selben alten nides. Er quit: 'sin sumiliche, thoh in thaz uuerk liehe, sie thoh bi thie meina thes argen nemen gouma, Thaz sie thaz io spurilon, uuio sie in abuh redinon, ioh sie thes io faren, uuioz hintorort gikeren.' 75 Nu sie thaz ni mident, so hohan gomon rinent, sie ouh thaz ni eltent, then gotes drut so sceltent: Uuaz duit thanne iro frauili theru minera nidiri, ioh iro uuillo ubiler? got biskirme mih er! - Sus sint thiu thing ellu, so ih thir hiar nu zellu, 80 sus missemo muate sint ubile ioh guate. Thie einun uuellent in uuar thaz guata ofonon sar, thie andere mit ilon iz uuollent sar firdilon. Thie guate es sar biginnent ioh iz frambringent, ioh sint fro thrato rehtero dato, 85 Thie andere alle filu frua sero grunzent tharzua, sero duit iu thiu frist, theiz bithekitaz nist. Nu bifilu ih mih hiar then beziron allen in uuar, allen gotes theganon mit selben Kristes seganon. Thaz thie selbun smahi min in gihugti muazin iro sin, 90 mit uuorton mih ginuagen zi druhtine gifuagen, Io sar in themo friste zi uualtantemo Kriste, zi uualtanteru henti ana theheinig enti. Themo si guallichi ubar allaz sinaz richi, ubar allo uuorolti si diuri sin io uuonanti, 95 In erdu ioh in himile, in abgrunte ouh hiar nidere, mit engilon ioh mannon, in euuinigen sangon! Ther mih hiar so gidrosta, thero arabeito irlosta, thaz er min githahta, zi stade mih bibrahta. Thoh ih tharzua hugge, thoh scouuon sio zi rugge, 100 bin mir menthenti in stade stantenti. Si guallichi thera ensti, thiu mir thes io gionsti, lob ouh thera giuuelti ana theheinig enti, In erdu ioh in himile, in abgrunte ouh hiar nidere, mit engilon ioh mannon, in euuinigen sangon! Amen.